گنجان ترین رہائشی علاقوں میں سرعام دکانوں پر بھی متعدد جگہ اپنے جانوروں کو ذبح کر کے فروخت کرنے کا سلسلہ جاری
کوئی بھی ذمہ دار چاہے تو شواہد کے ساتھ اپنا موقف دے سکتا ہے جسکو ادارہ اپنی غیر جانبدرانہ پالیسی کے مطابق مناسب جگہ فراہم کرے گا
راولپنڈی ( پ ر ) راولپنڈی کنٹونمنٹ بورڈ کے رہائشی علاقوں میں قصابوں کی دوکانوں سے افسران کے ناموں پر پائے اور بونگ مبینہ طور پر مانگے کا الزام لگاتے ہوئے ذرائع نے یہ بھی دعویٰ کر دیا ہے کہ گنجان ترین رہائشی علاقوں میں نا صرف نجی ذبح خانے بنے ہوئے ہیں بلکہ سرعام دوکانوں پر بھی متعدد جگہ اپنے جانوروں کو ذبح کرکے فروخت کرنے کا سلسلہ جاری ہے جبکہ انچارج میٹ اینڈ ملک رانا محمد شعیب عظیم کی جانب سے افسران کو سب اچھا ہے کی رپورٹ دیتے ہوئے اپنے ماتحت عملے پر سے چیک اینڈ بیلنس کم کر دیا گیا ہے جس کے سبب ایک جانب مختلف قصابوں سے پائے اور بونگوں کا فرمائشی پروگرام جاری ہے جس کے سبب اہلیان کینٹ کی نظروں میں بورڈ افسران کی عزت اور احترام میں کمی واقع ہونا شروع ہو گئی ہے تو دوسری جانب قصابوں کو اپنے مبینہ مفادات کی خاطر کھلی چھٹی دینے سے نجی جانوروں کے چکر میں بوڑھے ، بیمار اور لاغر جانوروں کے گلوں پر چھریاں چلا کر اہلیان کینٹ کی صحت کو داؤ پر لگا دیا گیا ہے ۔ ذرائع کا دعویٰ ہے کہ انچارج میٹ اینڈ ملک رانا شعیب عظیم نے بغیر نوٹس ہی سینی ٹیشن سے اپنے منظور نظر ملازمین کو لاکر اپنی ٹیم کا حصہ بنا لیا ہے تو دوسری جانب انکی ٹیم میں بلڈنگ سیکشن سے کوتاہیوں اور مالی نا ہمواریوں کے الزامات پر تبدیل اور معطل ہونے والے ملازمین شامل ہیں ۔ ان حالات میں اور ایسی ٹیم سے پائے اور بونگ تو کیا افسران کے نام پر پورا جانور ہی مانگ لینا کوئی اچمبے کی بات نہیں ہے ۔ اس ضمن میں کوئی بھی ذمہ دار چاہے تو شواہد کے ساتھ اپنا موقف دے سکتا ہے جسکو ادارہ اپنی غیر جانبدرانہ پالیسی کے مطابق مناسب جگہ فراہم کرے گا
