پی پی-167 میں بلا مقابلہ جیت آئین و قانون کے منافی ہے ۔
ن لیگ بلدیاتی ایکٹ کے ذریعے پنجاب بھر میں ہارس ٹریڈنگ کو فروغ دینا چاہتی ہے۔
پی پی 167 میں دوبارہ الیکشن کروائے جائے بلا مقابلہ جیت کو تسلیم نہیں کرتے جماعت اسلامی میدان میں مقابلہ کریگی
امیر جماعت اسلامی لاہور ضیاء الدین انصاری ایڈووکیٹ ، امیر جماعت اسلامی عربی لاہور علی ارتضی حسنی , امیدوار پی پی 167 چوہدری عبدالقیوم گجر کا احتجاجی مظاہرے سے خطاب
لاہور (عمرحیات چوہدری) امیر جماعت اسلامی لاہور ضیاء الدین انصاری ایڈووکیٹ نے کہا کہ چار روزہ عوامی ریفرنڈم میں لاکھوں شہریوں نے بھرپور شرکت کرتے ہوئے اپنا حقِ رائے دہی استعمال کیا اور پنجاب حکومت کے متنازعہ، غیر جمہوری اور عوام دشمن بلدیاتی ایکٹ کو واضح طور پر مسترد کر دیا۔ یہ ریفرنڈم عوام کے اجتماعی شعور، جمہوری سوچ اور حکومتی پالیسیوں پر عدم اعتماد کا دوٹوک اظہار ہے۔ امیر لاہور نے موجودہ بلدیاتی ایکٹ کو “کالا قانون قرار دیتے ہوئے اس کے خلاف بھرپور عوامی مزاحمت کا اعلان کرتے ہوے کہا کہ جلد پنجاب اسمبلی اور وزیر اعلی ہاؤس کے گھیراؤ کا اعلان کیا جائے گا ۔ ان خیالات کا اظہار امیر جماعت اسلامی لاہور ضیاء الدین انصاری ایڈووکیٹ نے پی پی-167 میں منعقدہ بڑے احتجاجی مظاہرے سے خطاب کرتے ہوئے کیا۔ انہوں نے کہا کہ ن لیگ بلدیاتی ایکٹ کے ذریعے پنجاب بھر میں ہارس ٹریڈنگ کو فروغ دینا چاہتی ہے، جسے جماعت اسلامی کسی صورت کامیاب نہیں ہونے دے گی۔ انہوں نے اعلان کیا کہ بلدیاتی ایکٹ کے خلاف عوامی تحریک مزید تیز کر دی گئی ہے اور جلد وزیراعلیٰ ہاؤس کے باہر دھرنے کی کال دی جائے گی۔ امیر جماعت اسلامی لاہور نے پی پی-167 میں ن لیگ کے امیدوار کی بلا مقابلہ کامیابی کو آئین، قانون اور جمہوری اقدار کی کھلی خلاف ورزی قرار دیتے ہوئے کہا کہ من پسند افراد کے کاغذاتِ نامزدگی جمع کروا کر بعد ازاں انہیں واپس لیا گیا تاکہ بلا مقابلہ جیت کی راہ ہموار کی جا سکے۔ انہوں نے واضح کیا کہ جماعت اسلامی اس غیر آئینی عمل کو عدالت میں ثابت کرے گی۔ احتجاجی مظاہرے سے امیر جماعت اسلامی ضلع غربی لاہور علی مرتضیٰ حسنی، پی پی-167 کے امیدوار چوہدری عبدالقیوم گجر اور دیگر قائدین نے بھی خطاب کیا۔ ڈپٹی سیکرٹری جماعت اسلامی لاہور قیصر شریف ،شاہد نوید ملک، صدر جے آئی یوتھ جبران بٹ سمیت بڑی تعداد میں کارکنان نے شرکت کی ۔مقررین نے پی پی-167 میں غیر آئینی اور غیر جمہوری جیت کے خلاف بھرپور احتجاج کرتے ہوئے فوری طور پر دوبارہ الیکشن کرانے کا مطالبہ کیا اور خبردار کیا کہ اگر جلد دوبارہ انتخابات کا اعلان نہ کیا گیا تو احتجاج کا دائرہ پورے شہر میں وسیع کر دیا جائے گا۔امیر جماعت اسلامی لاہور نے مزید کہا کہ ریٹرننگ آفیسر نے وزیراعلیٰ پنجاب مریم نواز کی ہدایت پر جماعت اسلامی اور دیگر امیدواران کو زبردستی روکا، جبکہ ہمارے امیدوار اور وکیل کو اغواء کیا گیا۔ پی پی-167 کے ضمنی انتخابات میں یہ متنازعہ عمل کسی صورت قابل قبول نہیں۔ انہوں نے الیکشن کمیشن آف پاکستان سے مطالبہ کیا کہ فوری طور پر اس نوٹیفکیشن کو کالعدم قرار دیا جائے پی پی-167 کے ضمنی انتخابات کے لیے نیا شیڈول جاری کیا جائے۔ تمام سیاسی جماعتوں کو لیول پلینگ فیلڈ دی جائے اور عوام کو آزادانہ، شفاف اور غیر جانبدار ماحول میں رائے دہی کا حق فراہم کیا جائے۔ امیر جماعت اسلامی لاہور نے واضح کیا کہ اگر عوامی فیصلے کا احترام نہ کیا گیا اور بلدیاتی ایکٹ میں بنیادی اصلاحات نہ کی گئیں تو عوامی احتجاجی تحریک کو مزید منظم اور وسیع کیا جائے گا، جس کے تحت پنجاب اسمبلی اور وزیراعلیٰ ہاؤس کا گھیراؤ بھی کیا جائے گا۔ جماعت اسلامی عوام کے جمہوری حقوق کے تحفظ اور بااختیار بلدیاتی نظام کے قیام تک اپنی جدوجہد جاری رکھے گی۔
