اسلام آباد (رپورٹر ) ڈپٹی انسپکٹر جنرل آف پولیس اسلام آباد محمد جواد طارق نے وفاقی دارالحکومت میں امن و امان کی صورتحال کا جائزہ لینے کے لیے مختلف ڈیوٹی پوائنٹس کا دورہ کیا۔ اس موقع پر سینئر پولیس افسران بھی ان کے ہمراہ تھے۔دورے کے دوران ڈی آئی جی اسلام آباد نے ڈیوٹی پر موجود افسران اور جوانوں سے ملاقات کی، ان کی کارکردگی کا جائزہ لیا اور انہیں مزید چوکس رہنے کی ہدایت کی۔ انہوں نے کہا کہ پولیس فورس کو شہریوں کے تحفظ کے لیے ہمہ وقت تیار رہنا چاہیے اور امن و امان برقرار رکھنے میں کسی قسم کی غفلت برداشت نہیں کی جائے گی۔
ڈی آئی جی محمد جواد طارق نے افسران کو ہدایات دیتے ہوئے کہا کہ:”ہر افسر چوکس رہے، شہریوں کے تحفظ میں کوئی کمی برداشت نہیں کی جائے گی۔ شہر میں امن و امان کا تسلسل ہر قیمت پر برقرار رکھا جائے۔ کسی بھی قسم کی شرپسندی یا قانون شکنی کی صورت میں قانون فوراً حرکت میں آئے گا، اور کسی کو بھی قانون ہاتھ میں لینے کی اجازت نہیں دی جائے گی۔”انہوں نے مزید کہا کہ پولیس کی اولین ترجیح شہریوں کے جان و مال کا تحفظ ہے، جو پولیس کے مشن کا بنیادی حصہ ہے۔ ان کا کہنا تھا کہ وفاقی دارالحکومت کو پرامن رکھنے کے لیے پولیس فورس بھرپور اقدامات کر رہی ہے اور گشت کے نظام کو مزید مؤثر بنایا جا رہا ہے تاکہ کسی بھی ہنگامی صورتحال میں فوری ردِعمل دیا جا سکے۔ڈی آئی جی اسلام آباد نے شہریوں سے اپیل کی کہ وہ کسی بھی غیر قانونی سرگرمی سے گریز کریں اور پولیس کے ساتھ مکمل تعاون کریں تاکہ شہر میں امن و امان کا ماحول برقرار رکھا جا سکے۔انہوں نے کہا:”شہریوں کے جان و مال کا تحفظ ہمارا مشن ہے، جبکہ عوام کا اعتماد ہمارا سب سے قیمتی سرمایہ ہے۔”ڈی آئی جی محمد جواد طارق کے مطابق اسلام آباد پولیس شہریوں کی خدمت اور تحفظ کے لیے ہر ممکن وسائل بروئے کار لا رہی ہے، اور عوام کے تعاون سے وفاقی دارالحکومت کو مزید پرامن بنانے کے لیے کوششیں جاری ہیں۔
