پنجاب ڈویلپمنٹ پروگرام (پی ڈی پی) اور سی ایم پیکج کے تحت ترقیاتی سکیموں پر فوکس کرتے ہوئے مقرر ٹائم لائن کے مطابق مکمل کرنے کی ہدایات
ڈپٹی کمشنر فیصل آباد محمد نعمان صدیق نے بھی سیکرٹری کے ساتھ وزٹ کیا
مینجنگ ڈائریکٹر واسا ثاقب رضا کی ترقیاتی سکیموں پر 70 فیصد سے 90 فیصد تک کام مکمل کرنے کی بریفنگ
فیصل آباد (آصف چوہدری) صوبائی سیکرٹری ہائوسنگ نورالامین مینگل نے پنجاب ڈویلپمنٹ پروگرام (پی ڈی پی) اور سی ایم پیکج کے تحت ترقیاتی سکیموں پر فوکس کرتے ہوئے مقرر ٹائم لائن کے مطابق مکمل کرنے کی ہدایت کی ہے جبکہ انہوں نے واضح کیا کہ تمام ترقیاتی سکیموں پر حفاظتی انتظامات مکمل رکھے جائیں کیونکہ قیمتی انسانی جانوں کے تحفظ یقینی بنانے پر کوئی سمجھوتہ نہیں کیا جا سکتا۔ سیکرٹری ہائوسنگ پنجاب نورالامین مینگل نے دورہ فیصل آباد کے دوران ڈپٹی کمشنر محمد نعمان صدیق کے ہمراہ واسا ہیڈ آفس کا وزٹ کیا اور وہاں پر پنجاب ڈویلپمنٹ پروگرام اور سی ایم پیکج کی ترقیاتی سکیموں بارے تفصیلی بریفنگ لی۔ اس موقع پر مینجنگ ڈائریکٹر واسا ثاقب رضا نے بتایا کہ سی ایم پیکج کی ترقیاتی سکیموں پر 70 فیصد سے 90 فیصد تک کام مکمل ہو چکا ہے جبکہ پنجاب ڈویلپمنٹ پروگرام کے تحت ترقیاتی سکیموں پر 30 فیصد سے زائد مکمل کر لیا جائے گا۔ بعد ازاں سیکرٹری ہائوسنگ پنجاب نورالامین مینگل نے ڈی سی نعمان صدیق کے ہمراہ اعوان چوک گلستان کالونی سائٹ کا دورہ کیا جہاں پر نگہبانپورہ کے سیوریج سسٹم کی اپ گریڈیشن کے لئے پائپ لائن بچھائی جارہی ہے۔ انہوں نے وہاں پر بچھائے جانے والے پائپس کی کوالٹی کو چیک کیا اور کہا کہ ترقیاتی سکیموں پر حفاظتی انتظامات ہر صورت مکمل رکھے جائیں ۔ سیکرٹری ہائوسنگ نے واضح کیا کہ ترقیاتی سکیموں میں استعمال ہونے والے پائپس سمیت دیگر تمام میٹریل اعلیٰ کوالٹی کا استعمال کیا جائے جبکہ ان ترقیاتی سکیموں کی کڑی نگرانی کی جائے تاکہ فنڈز کے استعمال کو شفاف رکھا سکے۔ انہوں نے مزید کہا کہ ترقیاتی سکیموں کی تعمیراتی رفتار کو مزید کیا جائے جبکہ ہر سکیم کو اینڈ ٹو اینڈ مکمل کیا جائے اور ان تمام ترقیاتی سکیموں کو مقررہ کردہ ٹائم لائن کے مطابق ہر صورت مکمل کرنا لازمی ہے۔ سیکرٹری ہائوسنگ پنجاب نے واضح کیا کہ فیصل آباد کے سیوریج سسٹم کو اپ گریڈ کیا جا رہا ہے اور ان ترقیاتی سکیموں کی بروقت تکمیل پر ان کے ثمرات عوام تک پہنچنے چاہئے۔
